దైవ లీలలు

సుందరకాండ పారాయణ చేసే వారందరికీ ఆ మహిమ ప్రత్యక్షంగా కనబడుతూనే ఉంటుంది. కొందరికి బాహ్య ప్రపంచంలోనూ కనబడుతుంది, కొందరికి మానసోల్లాస రూపంలో మాత్రమే కనపడవచ్చు.

నే్ను మా అన్నగారి ప్రేరణతో మొదటిసారిగా నాలుగు సంవత్సరాల క్రితం సప్తసర్గి పారాయణ చేశాను. అప్పటి అనుభవం ఇది.
(ఈ విధానం తెలియనివారికోసం: ఇది, రోజుకి ఏడు సర్గలు చొప్పున పారాయణ చేసే ఉత్తమ విధానము. తొమ్మిదరోజుకి్ అరవై మూడు సర్గలు పూర్తవుతాయి. పదవరోజు అరవై ఎనిమిదవ సర్గ పూర్తయినాక తిరిగి ఒకటవ, రెండవ సర్గ చేయాలి. ఇలా చేస్తూ పోగా, అరవై ఎనిమిదవరోజున ఏడు ఆవృత్తులు అయేసరికి అరవై ఎనిమిదవ సర్గ చివరిదవుతుంది. ఆరోజుతో పారాయణ సమాప్తి చేసి భగవత్సమర్పణ చేయాలి.)

మా నివాసం బెంగళూరులో. ఇక్కడ కొన్ని ప్రాంతాలలో కోతులు ఉంటూ ఉంటాయి. మేము ఉన్న చోట కూడా ఉండేవి. కానీ విచిత్రంగా, నా పారాయణ జరుగుతున్న రోజులలో ప్రతిసారీ చివరి సర్గ జరిగిన రోజున, అదీ నేను పారాయణ చేసే సమయంలో వచ్చి వెళ్ళేవి. ఇంట్లో చొరబడి కనీసం ఒక అరటిపండైనా సంగ్రహించుకుపోయేవి.

మా అన్నగారి సూచన మీద చేశానే కానీ, నియమ నిష్ఠల గురించి ప్రత్యేకంగా తెలియదు. అరవై ఏడవరోజున, చివరిరోజు బ్రాహ్మణ సంతర్పణ (కనీసం ఒక్కరికి) చేయాలని తెలిసింది. ఎవరికీ ముందుగా చెప్పుకోలేదు కనుక ఈసారికి నమస్కారం తో సరిపెడదామనుకున్నాను. "రేపు పూర్తవుతుంది కదా, విశేష నైవేద్యం చేద్దాం" అనుకుని అంగడిలో కనబడ్డ ఉత్తమ ఫలాలను తెచ్చాను.
ఆరోజు రాత్రి మా అన్నగారి ఫోను వచ్చింది. మరుసటిరోజు తను "మరో ముగ్గురితో" కలిసి శృంగేరీ నుంచి తిరుగు ప్రయాణంలో మా ఇంటికి వస్తున్నట్టు చెప్పాడు.
అనుకున్నట్టుగా రానే వచ్చారు. ఆ మరో ముగ్గురు, మా బంధువులే. వారిలో ఇద్దరు దంపతులు! వారిపేర్లు, "లక్ష్మీపతి, సీత." ఆ అతిథులు ముగ్గురికీ చేతనైనంతలో సమారాధన చేసి సత్కరించాము.

వాళ్ళు వస్తూ మరిన్ని పళ్ళు తెచ్చారు. సరే అని నేను ముందురోజు కొన్న వాటిలో ప్రత్యేకించి నైవేద్యం పెట్టాలనుకున్న పెద్ద అరటి పళ్ళ హస్తాన్ని పక్కన పెట్టి మిగిలిన పళ్ళను నైవేద్యం పెట్టాను. ఆశ్చర్యం ఏమిటంటే, ఆరోజు పారాయణ చేసి పూజ చేసి నైవేద్యం, ఆరతి అన్నీ చేసి నమస్కారం చేస్తుంటే అందరూ వసారాలోనూ ముందుగదిలోనూ ఉండగానే అతి నిశ్శబ్దంగా ఒక నిండు గర్భిణీ కోతి వచ్చి నేను వదిలేసిన పెద్ద అరటిపళ్ళ హస్తాన్ని తీసుకుని అంతే నిశ్శబ్దంగా జారుకున్నది. కొందరు చూసి ’భయపడి’ ఊరుకున్నారు, కొందరు చూడనేలేదు. బయటికి్ వెళ్ళి వసారాలో కూచుని అందులోని సగం పళ్ళు ఆరగించేసింది ఆ కోతి. సాధారణంగా కోతులు కాస్త అల్లరి చేస్తూ తింటాయి. గర్భణీ కోతులు కాస్త ప్రశాంతంగా ఉంటాయి కామోసు. పైగా అప్పుడు ఆ కోతుల దండు అంతా వీటిమీదకి ఎగబడలేదు. అది వదిలేసిన తరువాత మాత్రం ఆ పళ్ళ మీద మిగిలిన కోతులు వీరంగం వేస్తూ వసారా అంతా చెత్త చేస్తూ తిన్నాయి!!

తరువాత ఇంత dramatic గా కాకపోయినా మహిమలు చాలానే చూపిస్తున్నారు!

-శ్యామ శర్మ